ياولاد مصر انا ابن مصر واخو الشهيد

إن هذه الخاطرة من خواطر حبيبى وعشقى ومعلمى وأستاذى أبى العزيز الغالى مهندس محمد أباظة فقد زرع فى حب الشعر العامى لكنه يختلف عنى كثير . فإنه لا يخونه قلمه يكتب الكلمة المهذبة .. وقد عاصر حرب 67 وحرب الأستنزاف .. وأكتوبر 73
إليكم
ياولاد مصر أنا أبن مصر وأخو الشهيد


مصر الوطن .. مصر البلد
أم الصبية .. وأخت الولد
مصر حبيبتى ... مصر قريبتى
صلة قرابة من قريب مش من بعيد
لحن الربابة .... وضرب المدافع
وصوت القطر عل السكة الحديد
صوت الفؤس بتعزف سيمفونية ف الغطان
ندا ألف مؤذن بيرفعوا ف لحظة واحدة الأدان
وأغمض عينى يامصر وأفتكر أيام زمان
..أيام ما كنا بنلعب ف الشوارع وأحنا تلامذة
وراجل كبير بينده علينا أسمه عم حمزة
خلوا بالكو ياولاد م الترام .....
.خلوا بالكو من هدمكو أتوسخت ... ياولاد حرام ...
.ونسيبه ونجرى ...ما أهو لسه بدرى
على ميعاد المدرسة
ونشوط أى طوبة بتقابلنا ....
والتراب يجى ف عيونا
وبكم المريلة نمسح جفونا
ونسمع عم حمزة بينده علينا
ياولاد كفاية جزامكم أتقطعت .. وأتوسخت
وأغمض عينى يامصر وأفتكر
لسه فاكر أبو الرجال...... وعاشور قلب الأسد
وبكر أبن البلد ومراته لوزة ...وأبنهم لما أنحسد
ولما كبرت يامصر رحت لجل ما نطهر عرضنا .
. قاموا خدو أرضنا
ورجعت ياحبيبتى شايل الهزيمة فوق كتافى
وسبت هناك ف سينا الحبيبة طهرى وعفافى
وقلت ف يوم أرجع أردهم
ودخلت شارعنا مخبى وشى من جيرانا
ليشوفونى ويقولوا ده هزمنا
وحبست نفسى يامصر مع ذكرياتى
دافن همومى بين ضلوعى وف أهاتى
خايف لتشوفنى حنان ..... بنت الجيران
كنت يامصر بحبها... خايف لتقولى أنت جبان
أو تغير رأيها
وبالمناسبة ياولاد العشق مش عشق الصبية للصبى
العشق الحقيقى هو عشق الأله
وحب النبى
المهم وأنا عايش محنتى جانى الخبر
رجعت وحدك وسبت أخوك هناك بعيد
أنت السبب .... أنت السبب
أخوك يافندى مات شهيد
الخبر نزل عليا يهزنى ويشدنى
ويقولى مات شهيد.... أخوك الوحيد
وف ملامحى ... رسمت جرحى
وخبيت قسايا جوه قلبى
وعملت صيوان كبير لجل ما أخد فيه العزا
أمى قالت لى لا أنت أبنى وألا أعرفك
أن ما جبت لى خبر يشرفنى ويشرفك
خزلتنى أمى
رايح ياامه أشكى لأبويا
نظر لى نظرة ورفع أيديه للسما
قلت له ليه ياابه ما بتردش على السلام
المسكين من صدمته فقد الكلام
نزلت من عينى دمعة سخنة عل الخدود
عبرت حدود
البيت السعيديامصر غيم الحزن عليه
وأم البطل رفضت تقبل العزا فيه ..
..( وعدت سنين )
وأحنا زى ما أحنا
قاعدين نلملم جراحنا
وف يوم جديد بعتوا خدونا
قلنا زى كل مرة حيدربونا
يمكن سلاح جديد
ده أحنا ف صيام وبعده عيد
وجه قائدنا ببدلة مموهة وقف قصادنا
وقال يانمور.... يالله العبور
الله وأكبر .. الله وأكبر
ياأسود ... عدوا الحدود
والله أكبر كلمة سرنا
وف ساعات كنا هناك .. عندهم
الله أكبر زلزلت الأرض من تحتهم
وطينا بوسنا تراب الوطن
أرض سينا .. وسويسنا الحزينة
اللى فرحت لما شفتنا
بيوت السويس صرخت وقالت أنتو جيتو ياوحوش
فين باقى الجيوش
قلنا ياسويسنا ف الطريق من بعدنا
جينا كلنا
لجل ما نخلصك من عدوك ونطهرك
لجل ما نسهر معاكى زى زمان ونسهرك

ونزلت أجازتى
ومن أول الشارع أنده على أمى
ياأم البطل قومى زغرتى
قومى أمسحى همك وهمى
ياأم البطل قومى أفرحى
وخدى العزا ف الشهيد
أخويا الوحيد
وناديت على أختى
قولى لحبيبتى
النصر هوه مهرها
وأبو الشهيد بقى صهرها
ولقيت أبويا بينده عليا
جبت ياولدى أغلى هدية
النصر هوه هديتى
دى الأرض شربت دمعتى
بعد ما داقت دم الشهيد....
__________________

[ALIGN=CENTER]شاعرنا العزيز احمد

شكرا للوالد العظيم ابن مصر الذى شرب من ماء نيلها وشم هواؤها وعاش تحت زرقة سماؤها
ابدع شاعرنا اباظة باستهلال القصيدة بوصف البيت المصري والحارة المصرية والطفولة المصرية ورغم بساطة اهل مصر الا ان قلوبهم تحمل الحب الكبير

ثم ينتقل الي اصعب فترة مرت بمصر

وهي نكسة بلادى
ولما كبرت يامصر رحت لجل ما نطهر عرضنا .
. قاموا خدو أرضنا
ورجعت ياحبيبتى شايل الهزيمة فوق كتافى
وسبت هناك ف سينا الحبيبة طهرى وعفافى
وقلت ف يوم أرجع أردهم
ودخلت شارعنا مخبى وشى من جيرانا
ليشوفونى ويقولوا ده هزمنا
وحبست نفسى يامصر مع ذكرياتى
دافن همومى بين ضلوعى وف أهاتى
خايف لتشوفنى حنان ..... بنت الجيران
كنت يامصر بحبها... خايف لتقولى أنت جبان
أو تغير رأيها
ثم توالت الاحداث حتى تحقق النصر لمصر

دى مش قصيدة
ولا سيمفونية
دى ملحمة يا احمد

بلغ الوالد اعجابي الشديد ودام مبدعا رائعا
من قلب تقى سلام وتحية [/ALIGN]

أختى تقى
لم أكتب ردى ألا بعد أن أبلغته سلامك
تحياته لكى
وتحياتى لكى
سلمت لنا تقى
لا تحرمينا

الأخ العزيز العبد الفقير

فعلا ذى ما الأخت تقى وصفت انها ملحمة

ومن صور معانيها الجميلة احسست انى امام شاشة السينما

ابداع راقى حنون

ادام الله العمر لة

ويبدو انك الوجة الأخر من العملة امام كتابة الوالد العزيز

دام مبدعا وابا لنا

شكرا

اخى العزيز العبد الفقير انا كمان ارجو ان توصل سلامى وحبى وتقديرى واحترامى لوالدك الحبيب واحب اقولك معانىالكلمات هزت مشاعرى وجعلتنى اعيشها كلها
احيييك اخى الكريم العبد الفقير وانحنى احترام وتقدير لوالدك شكرا لكما

أخى الطيب وائل
أشكر لك حضورك ومرورك
تحياتى لك أخى الكريم الطيب

أختى الطيبة بلبلة
لكى منى ومن والدى كل التحية
مشكورة جارتى العزيزة على مرورك الغالى
دمتى لنا

[ALIGN=CENTER]إبن الوطن.[/ALIGN]
أخي العبد الفقير .. تحية لوالدك المحترم.. أنت غني بوالدك بوطنك بإخلاصك.. وغني عن التعريف.. بلد وشعب أرخ أبطاله أجمل وأسمى التضحيات والبطولات.
هنيئا لك بوالدك أطال الله بقائه..
واحترامي.

أيتها الجوهرة النادرة
ياقوتة
نعم
أنا غنى حقا
ولكن بتشريفك لخاطرتى والتى نقلتها عن والدى
لكى منا كل الحترام والتقدير