مع سبق الاصرار

امام وكيل النيابة يقف فلاح صغير ، نحيف جدا

وله تعبيرات صارمة عابسة .. وعلى رأسه كومة من الشعر الملبد

الذى لم يمشط منذ زمن طويل .. مما يضفى علية مزيدا من الصرامة العنكبوتية

وهو حافى القدمين .

وكيل النيابة يبدأ التحقيق :

_ انت ياجدع انت ! .. قرب واجب على اسئلتى .

فى السابع من مايو الجارى كان حارس السكه الحديد سامى ابو المجد

يقوم بالتفتيش صباحا على الخط ، فوجدك عند الكيلو 141 متلبس بفك صامولة

من الصواميل التى تثبت بها القضبان على الفلنكات . وها هى الصامولة .

هل هذا هو ماحدث ؟

الفلاح : اه حصل ياباشا

_ هل حدث هذا كما ذكر ابو المجد ؟

_ معلوم ، حصل .

_ طيب ، ولأى غرض فككت الصامولة ؟

_ اه ؟

_ بقولك اية سيبك من اهك دى وجاوب على السؤال :

لأى غرض فككت الصامولة ؟

ياباشا كنت محتاجها ولو مش محتاجها كنت هفكها لية يعنى ؟

_ وما حاجتك الى الصامولة ؟

_ احنا معاليك بنعمل منها ثقالات السنانير ...

_ ومن هؤلاء ( احنا ) ؟

_ احنا ، الناس .. فلاحين الناحية يعنى .

_ اسمع يا أخينا ، بلاش تتظاهر بالغباء واتكلم بصراحة

كفاية كذب بخصوص الثقالات !

_ انا عمرى ما كذبت ، فهكذب دلوقتى لية ؟

وبعدين ياباشا هو ينفع تصيد من غير ثقالة ؟

لو حطيت الطعم او حشرة فى السنارة فمش ممكن تغوص الى القاع من غير الثقالة ؟

( يضحك الفلاح ضحكة قصيرة ويقول )

ده حتى السادة ايضا عندنا بيصطادو بنفس الطريقة .. حتى اصغر عيل مش ممكن يصطاد من غير الثقالة

_ يعنى انت معترف بأنك فككت هذة الصامولة لكى تصنع منها ثقالة ؟

_ مضبوط ! امال لألعب بيها !

_ ولكنك تستطيع ان تستخدم للثقالة الرصاص ، او اى مسمار ..

_ الرصاص مش ممكن تلاقية على الطريق ، لازم تشترية

والمسمار لا ينفع اطلاقا .. مافيش احسن من الصامولة .. هى تقيلة وفيها خرم .

_ انت هتتغابى .. انت ماتفهمش اية اللى ممكن يحصل من فك الصواميل دى ؟

لو ماكشفك الحارس ابو المجد لكان من السهل ان القطار يخرج عن القضبان

ولمات الناس ! كنت ستتسبب فى مقتل الناس !

_اعوذ بالله ياباشا ! اقتلهم لية ؟

احنا ناس تعرف ربنا مش اشرار .. الحمد لله ياباشا

انا عشت حياتى وماقتلتش حد ومافكرتش حتى فى كده ..

يا ساتر يا رب ارحمنا .. انت بتقول كده ازاى !

_ وما رأيك ، لماذا تقع حوادث انقلاب القطارات ؟ اذا فككت صامولتين او ثلاثا وقع الحادث !

يضحك الفلاح ضحكة سخرية ويحدق فى المحقق بارتياب .

_ لا ! من سنين وكل اهل البلد بيفكو الصواميل ، وربنا سترها ، وجنابك تقول : انقلاب القطارات !

وقتل الناس .. انا لو خلعت القضيب يمكن ساعتها ينقلب القطار .. لكن دى صامولة ! شىء بسيط !

_ انت ماتفهمش ان الصواميل لتثبيت القضبان فى الفلنكات !

_ احنا عارفين اه ... احنا مابنفكش كل الصواميل .. بناخد شوية صغيرة ونسيب الباقى ..

عندنا نظر .. فاهمين طبعا ..

_ فى العام الماضى خرج قطار عن القضبان هنا ... مفهموم الآن لماذا ...

_ انت بتقول اية حضرتك ؟

_ بقول مفهوم الآن لماذا خرج قطار عن القضبان فى العام الماضى .. الآن فهمت انا السبب !

_ ياباشا حضرتك متعلم علشان كده بتفهم .. ربنا اعلم لمين يعطى المفهومية

اهو جنابك عرفت وقدرت ، لكن الحارس زية زى الفلاح ، ماعندوش مفهومية

يمسك الواحد من قفاه ويشده .. طيب اعرف الأول وبعدين شد !

الفلاح فلاح ، ومخة فلاحى ...

اكتب سعادتك كمان ، انة ضربنى مرتين فى وجهى وفى صدرى .

_ عند اجراء التفتيش وجد عندك صامولة اخرى ..

فأين ومتى فككت هذة الصامولة ؟

_ حضرتك تقصد الصامولة اللى كانت تحت الصندوق الأحمر ؟

_ ماعرفش هى كانت فين لكنهم وجدوها لديك . متى فككتها ؟

_ انا مافكتهاش .. دى اعطهانى حميدة ابن سناء العورة .

انا اقصد على الصامولة اللى تحت الصندوق ، اما التانية اللى فى الزحافة فى الحوش

فككتها انا وخضر

_ خضر مين ؟

_ خضر ياباشا انت ماتعرفوش ؟

ده اللى بيصنع الشباك ويبيعها للصيادين الكبار .. وهو بيحتاج لصواميل كتير زى دى

وكل شبكة بتحتاج حوالى عشرة خمستاشر صامولة ....

_ اسمع ... المادة 1081 من قانون العقوبات تنص على ان كل تخريب متعمد للسكك الحديدية

يكون من شأنة تعريض سلامة وسيلة النقل المارة بها للخطر ،

وفى حالة معرفة الجانى بالعواقب الوخيمة التى سيؤدى اليها فعلة .. فاهم ؟

ولا بد انك تعرف الى اى شىء يؤدى فك الصواميل .. . يعاقب مرتكبها بالسجن مع الأشغال الشاقة .

_طبعا حضرتك أدرى .. احنا ناس جاهلة ... ودى خلق ناس تفهم ياباشا ؟

_ انت فاهم كل حاجة ! ولكنك تكذب ، وبتتظاهر بالغباء !

_ وانا هكذب لية ؟ أسأل اهل البلد ان كنت مش مصدقنى .. من غير الثقالة ما ينفعش تصطاد .

_ طيب ... اسكت

يسود الصمت . ويقف الفلاح متململا ، ويحدق فى الفراغ الذى امامة . والمحقق يدون بسرعة .

وبعد فترة من الصمت يقول الفلاح للمحقق

_ هل انصرف ؟

_ لا ، انت هاتروح تحت حراسة للسجن .

_ السجن ؟ لية ياباشا ! انا مستعجل ، لازم اروح السوق علشان اشترى اكل البيت ... والعيال

_ اسكت وبلاش تشوش عليّ .

_ اروح السجن ... لية انا عملت اية يستاهل السجن .. كده ومن غير اى سبب .. ذنبى اية ياباشا طيب ؟

انا ماسرقتش ولا اتعاركت مع حد .. ولا انت بتصدق العمدة ياباشا ... ده العمدة مايعرفش ربنا ...

_ قلتلك اسكت ... اخرس .

الفلاح يدمدم :

_ انا ساكت .. طيب انا مستعد احلف اليمين ان العمدة بيغالط فى الحساب .

_ انت بتشوش علىّ ...

ويصيح المحقق : _ يا سعيد ! خدة من هنا !

يدمدم الفلاح بينما يقتادة جنديان قويان خارج غرفة التحقيق :

_ احنا ثلاثة اخوه .. والأخ لا يحاسب على ذنب اخيه ... اخويا مابيدفعش وانا ابقى المسئول !

فين العدل هنا طيب ... لو الكبير الله يرحمه ما ماتش كان وراكم الويل

ياباشا اذا حكمتم فلتحكموا بالعدل ، بالمفهومية .. مش كده من غير ذنب

حتى لو حكمتم بالجلد واية يعنى .. المهم يكون بالحق ، بالأمانة ....

الفكرة مقتبسة من قصص تشيكوف ..

و التلخيص عن رواية مع سبق الاصرار لتشيكوف.

تحياتى .

واقع حال

هل هو دهاء الفلاح الفقير ام جهله

وهل الحاله الماديه هي التي اوصلت الجهل الى هذا الطريق بعدم المبالاة بممتلكات الدوله

التي تؤدي الى خسائر بارواح اناس ليس لهم ذنب

سوى ان فلاح بسيط احتاج صامونه

فاين سنذهب بالعمده السارق وشيخ الغفر الشرير والكثير الكثير

اخي وائل

سرد جميل

وقصة لامست الواقع

كن بخير دائما

استاذة / هيفاء

استاذتى هنا مرة واحدة

شكرا يافندم على المرور الجميل والتعليق

وهى دنيتنا اصبحت زى ما حضرتك وصفتى

يعنى لازم كبش فدا ليجنوا الكبار من السؤال

والغلبان دايما بيكون كبش الفدا

شكرا كمان مرة لمرور حضرتك

ماحرمنا الله

دمتى بهناء .

اجدت اخى وائل فى التلخيص
واكيد هذا التحقيق لابد وان يكون فى قصص الخارج
اما لو كانت القصة عربية كنا سنرى حوارا اخر بين المتهم والمحقق
ولا علية اية حوار
كان هيمضى على الورق المكتوب الجاهز على طول
حاكم احنا مابنحبش نتعب الناس فى ال س وال ج



كلتة تمام يا باشا وجاهز
والمتهم اعترف بكل حاجة وقر عللى المسروقات واعترف كمان
انة الللى كان وراء اعدام طومانباى على باب زويلة
هو اللى شد الحبل بتاع المشنقة

وهو كمان اللى ولع الجورن بتاع الحمام فى قرية دنشواى المصرية
وعمل فتيل وفتنة بين المصرين والانجليز




ياباشا حضرتك متعلم علشان كده بتفهم .. ربنا اعلم لمين يعطى المفهومية
هجبتنى الجملة السابقة هذة

دمت بخير ياوائل

عزيزى / احمد

اولا اعتذر عن تأخيرى فى ردى عليك ..

وعمل فتيل وفتنة بين المصرين والانجليز

هههههههههههههه

ولو كبرت فى دماغهم ممكن يخلوه يعترف انه هو اللى دخل الانجليز مصر

مش عمل فتيل للفتنه وبس .

ياباشا حضرتك متعلم علشان كده بتفهم .. ربنا اعلم لمين يعطى المفهومية
هجبتنى الجملة السابقة هذة

طبعا ربنا اعلم ولا فيها اعتراض ؟

هههههههههههههههههههههههه

اشكرك على المداخلة الجميلة

والمرور العطر

تحياتى .

مراحب أخي وائل

جميلة حقا تعابيرك

والأروع لمساتك لواقع معاش

جميل ان نحاكي واقعنا .. ونحاورة ولو بكلمات

دمت بكل خير

تحيتي لشخصك

المشاركة الأصلية كتبت بواسطة أشجان مراحب أخي وائل جميلة حقا تعابيرك والأروع لمساتك لواقع معاش جميل ان نحاكي واقعنا .. ونحاورة ولو بكلمات دمت بكل خير تحيتي لشخصك

اختى / اشجان

الأروع هو مرورك العطر هنا

ماحرمنا الله

فكل من كان له منصب كبير ومتشبث به ويرجوا الحفاظ علية

ليس له الا ان يكيف رغبات من اعلى منه فى المنصب حتى ينال كل الرضا

هذا الا من عافاه الرب وسخرة لنصرة الضعفاء

دمتى ودام مرورك

تحياتى وتقديرى .