|
أوعى تعيا لحسن تمووووت
أوعى تعيا لحسن تموت
يبدو أن التمييز وصل لحداً لايمكن السكوت معه
ويبدو ايضا ان هناك قراراً سيصدر بمنع الفقراء من المرض
وسيتم اقتصار الامراض على ألاغنيا واصحاب الفئة السابعة من ال bmw والمرسيدس فئة 300 س او فئة ال 500 وانت طالع ... هتقلى ايه الموضوع ياعم !!! مالك كده داخل علينا سخن وحامى ووشك يقطع الخميرة من البيت ؟؟ !!!!!!!!!!!!!
هقولك انا بديكــ نصيحه يافقير ياتعبان ...انت امثالك الموت ليهم رحمة وكمان مش من حقك انك تمرض او تطلب العلاج وهقولك ايه السبب فى كده ...وتعالى ناخدها واحده واحدة بس اصبر معايا وماتقلقش وتعالى نشوف اسعار الدكاتره على سبيل المثال وده مش ترف بقى .. ده انت مابترحش للدكتور الا للشديد القوى....
ولو كان عندكــ شوية الصداع اديك بتمشى حالك بحباية اسبرين ولو شوية مغص اديك بتغلى شوية كمون وتشربهم وحتى لو بطحه من خناقة فى طابور العيش اديك بتكبسها شوية بُن وتربطها بشاش وخلصنا ...
المهم تعال شوف اسعار الدكاتره اللى مش ممكن ينزلوا فيها تعريفه وبالمناسبه اعرف دكتور لما زاد سعر البنزين زمان عشرة قروش رفع الكشف عشرة جنيه ماهو اصل القرش عندنا بعشره عنده.... المهم خلينا فى الموضوع علشان ماطلوش عليك وحتى لو طولت انت وراك ايه يعنى ماانت مرمى واعد فاضى ؟؟ يعنى هتلضم اللولى ياخي ولا هتوزن الغلة
دكتور الاسنان ( وهذا عن تجربة شخصية .. اوقف خلع الضرس لمجرد اننى حاولت ان اناقشه فى السعر )الكشف خمسين جنيه
وخلع ضرس العقل 500 جنيه
والضرس العادى 175 جنية
وحشو العصب ب 350 جنيه
ومش هقولك على ثمن طقم السنان
او لو عمل كوبرى او حشالك سنه
ومش هــ كلمك عن تقويم السنان لحسن تطب ساكت منى ويحسبوك عليا بنى ادم وانت اصلا ميت ميت
سيبكـــ من دكتور الاسنان وتعالى نتكلم على الحريم شوية حاكم انا احب اعدة الفسحة والحكاوى مع بنات حوا ...
ونقلها : اوعى تحملى او تفكرى تخلفى لحسن دكتورة التوليد هتدبحك وتسلخ جلد جوزك ، ولو كان لابد يعنىونفسكفى حتة عيل
وضروى من الحمل والولاده فانصحك تحملى فى توأم مره واحده علشان تبقى التكاليف واحده وتوفرى شويه من فلسوك اللى كنت هتصرفيها على الحمل التانى ... وبالطريقة دية تاخدى سعر الجملة وتضحكى على الدكتوره هات تقوليلى طيب اخليه ازاى اتنين ؟؟!!!
هقولك اتصرفيلك فى بويضه اضافيه وماتبقيش خايبه وسيبى الباقى على المحروس جوزك
وربنا هيوفق طالما النية خير
المهم تعالوا نسمع الاسعار والكلام ده فى منطقة شعبية او متوسطة وعلى المقيمن خارجها مراعاة فروق العملة
فمتابعة الحمل خلال الــ 9 شهور هتوصل 2000جنية ويمكن يبقى مش من ضمنها الاشعة التلفزيونية انا مش ضامن الجزئية دية بصراحة .. واجرة الولادة للطبيبه هتوصل 3500 جنيه والمستشفى هتخبطلها حوالى 2000 جنيه كمان ... ده غير تكلفة كلمة ( يابيه و ياهانم واللى جبلك يخليلك ويتربى فى عزك) اللى هتسمعها من كل واحد شغال فى المستشفى ومايترتب عليها من بقشيس واكراميات ليس لها نهاية او حد او مد
طيب سيبكــ من الولاده والحمل وخش على دكتور
الاطفال وخصوصا الشئ بالشئ يذكر طالما فى ولادة هيبقى فيه دكتور اطفال وطبعا هتبقى زيارته اسبوع واسبوع
وطبعا مره كشف ومره استشاره يعنى اعمل حسابك على 300 جنيه كشف شهرى ده طبعا غير تمن الادوية لزووووووووووووم
نزلات البرد ودرجة الحراره العاليه واللى مابتنزلش فهناخد مضاد حيوى
لان الواد عنده بكتيريا فى الزور مش فيرس .... على شوية شعب هوائية مقفوله فهناخد لها مينوفلين على فينادول
وممكن كمان طارد للبلغم ومزيب له ولو الحاله متكحوره هنوديه المستشفى ونعمله جلسات اكسوجين وتوسعة شعب على الجهاز
طبعا ده غير النزلات المعوية والاسهال وادوية الحساسيه
مش عايز اعكنن عليك ولا على اللى جابك واخليك تحلف ماتخلف او تتجوز اصلا وتجيب لنفسك وجع الدماغ ....
توكل على الله وده كاس كلنا شربناه وسعادتك لازم تتجرعه ..
سبنا مش شغل العيال وتعالى نخش على شغل الكبار
المخ و الاعصاب
اولا الكشف من 100 حتى 500 حسب الدرجة العلمية
وموقع عيادة الدكتور . وبداية كلامك مع الدكتور هواشعة بالرنين المغناطيسى وكده يبقى بنتكلم فى 650 جنيه اشعة
وبعد كده هـــ نخش على الغضروف اللى عندك واللى بان فى الاشعة يبقى بنتكلم فى 4000 جنيه لكل فقرة على حده ولو كنت خايف من العملية هنديك حقنه تبنى الغضاريف من تانى... بس بكام بقى الحقنة دية ياجميل ؟؟؟
بحوالى 20عشرون الف جنيها للحقنه الواحده ...ياترى انت هتحتاج كام حقنه بقى ياعسل انت ؟؟؟
الله اعلم ياعم الحاج ... وحظكــ العسر يمكن يكون عندك خشونه فى الركبه كمان ومحتاج تغير المفصل هتلاقى نفسك رايح فى سكة
الــ 25 الف جنيه وبعدها هتمشى بتعرج طبعا وتزك ... وهتروح للدكتور تانى هيقولك ماهو لازم نغير المفصل التانى علشان كده فيه مفصل اطول من مفصل وهتضطر ياجميل تنصاع لكلامه ...
وكع ياعسل دم قلبك ....
.بقولك ايه قفل على السيرة دية .... دهيه تغمك زى ماغمتنى وسودت لى عشتى كلها
..طيب اسمع منى الخلاصة ومش هتكلم تانى خالص والخلاصة ان العلاج تم حجزه للاغنياء فقط والفقراء اللى زى وزيك يروحو يموتو او يدفنوا حتى من غير كفن ... لان تمن الكفن واجرة التربى هتكون غاليه عليك ...ومافيش داعى للفشخرة والمنظرة وتعمل نعى فى الجرايد او تعمل صوان كبير او تحجز فى عمر مكرم او الحامدية الشاذلية او جامع رابعة العدوية ياريت تدفن من سكات يعنى سُكيتى على رأى فؤاد المهندس
ومش هكلمك لا على علاج فيرس سى ولا الغسيل الكلوى ولا علاج السرطان اعازنا الله انا وانت من شر كل الامراض ويجعله عامر والحمد لله على الصحة والجدعنه
والحمد لله ان ربنا ماخلاش الهواء فى اديهم خالص والا كانوا خنقونا واحنا على قيد الحياه . بس بمانه عندى لك خبر حلو اوى هيعجبك الجماعة دو ممكن يحقدوا عليك لانك مابتكلشبانيه بتاع الفراخ البيضا اللى بيغزوها على حبوب منع الحمل وبتعمل فشل كلوى ولا بتاكل لحمة بتلو او كندوز او ريش او بفتيك من اللحمة اللى عندها حمى قلاعية
شفت ازاى انت فى نعمة هما بيحسدوك عليها !!!
طب تعالى لما ارقيك بالبخور وعين العفريت الاعور
ويجعله عاااااااااااااااااااااااامر
|