تاني معلش عشان الموضوع كبير جدا جدا جدا وخد أكبر من حجمه جدا
موضوع مصر والجزائر عصبني وانجرفت فيه انا شخصيا اللي قولت مش حنجرف مع اي شحن اعلامي او جماهيري
والواحد فعلا حقيقي اعصابه فلتت منه اليومين دول كل ما تيجي سيره مصر والجزائر
ايه اللي بيحصل ده ؟؟
جزائريين يولعوا في علم مصر ويشتموا شعب مصر ولاعيبه مصر
مصريين يردوا ويقولك الالفين جزائري حنولع فيهم بعد المتش عشان الفيفا
دي عركه مش متش كوره
اه والله كده عركه رسمي يعني
يعني بنشكر العنايه الالهيه اللي خلت ليبيا حائل بين مصر و الجزائر
ده يا راجل تشوف الجرايد هنا والجرايد هناك
كأن الجزائر حتلاعب فرنسا او كأن مصر حتلاعب أسرائيل
واللي يغيظك ان الموضوع انتشر علي المستوي العربي كله
كاتب سعودي عمل مقال عن الموضوع سماه
( حرب الخليج تبعث من جديد في شمال أفريقيا)
لعلمكوا يا مصريين ويا جزائريين
مصر ساعدت الجزائر في ثورتها والجزائر ثارت كلها ايام حرب 56 علي أم العروبه من فرنسا وكيف تتجرؤ فرنسا علي ام العروبه..ثم ساعدت مصر في حرب 73 بكل احتياطي اموالها
الجزائر خلف مصر في اي منهج سياسي عربي تتخذه مصر من ذاك الحين وحتي الان
الشعب الجزائري بيحب الشعب المصري جدا ودي حقيقه واغلبهم بيجيوا يقضوا الصيف في مصر ومنهم كمان بعض لاعبي المنتخب الجزائري واليل ادلوا انهم عارفين المصريين جدا وانهم شعب مسالم
المشكله كلها بتنحصر ولازم نحصرها علي الاقل كبدايه في المجال ده
ان المصريين والجزائريين متعصبيين كرويا جدا زي كل شمال افريقيا ( وحط تحت كرويا الف خط) لأنهم مش متعصبين وطنيا ضد بعضهم البعض
لكن تعصب كروي قوي جدا جدا للكره..بالضبط زي معسكر الاهلي ومعسكر الزمالك في مصر
وهنا المفروض كلنا كمصريين وجزائريين منعديش الموضوع لأكتر من انه تعصب كروي
(علي الاقل كبدايه) لأن التعصب الكوري ايضا خطأ
اللي يولع في علم أخوه غلطان واللي يقول ححرق اخويا اللي حرق علمي غلطان غلطان طبعا
ياريت المواضيع تهدي شويه كلنا عرب ..في ايه..ماللي يكسب يكسب واللي يخسر يخسر
ده مسلم وبيقول يارب وده مسمل وبيقول يارب..ربنا بقي عارف مين يستحق مش حنعرف احنا ربنا يعني
واللي كاتبله ربنا يصعد كاس العالم حيصعد
واحد جزائري كاتب تعليقا علي فيديو حرق العلم علي سايت يو تيوب
(جايين نحتلكم يا مصريين)
فرديت عليه رد بقوله ( في أيه ياعم مالك.. أحنا مش اخوات ولا أيه)
صاحب الفيديو المصــــــــــري حذفلي ردي (ابن التيت
)
رد بعدي واحد مصري ابن حلال يا جزائريين يا ولاد اللــ.. حبه كلام ابيح زي الفل
قام داخل واد جزائري تاني يا مصريين حنعمل وحنسوي..حبه كلام ابيح زي الفل
يا جزائريين ويا مصريين احنا اخوات وبنحب بعض جدا
اي حد حيبص علينا مش حيقول غير ان
في شعبين قاعدين موراهمش لا شغله ولا مشغله غير الردح لبعض
الموضوع مهواش بلطجه ولا صياعه ولا قله ادب
وده حيحرق ده وده حيعور ده
دول حداشر شخص مصري حيلاعبوا حداشر شخص جزائري
مش تسعين مليون مصري حيدخلوا في معركه مع عشرين مليون جزائري
انا اتكلمت كتير اوي ونفسي اتكلم اكبر لأن الموضوع كبير
وحسيبلكم باقي الكلام واتمني من اي جزائري انه يشاركني الراي
حتي لو مش مسجل في المنتدي وبيمر سجل في المنتدي واكتب كلمه