الصاحب خدعني ودار فيّا الشينا
طلبت الفزع واطى عليا عينا

قعد يسألني
وقال صاحبي وما يشغلك يشغلني
عطاني كلام الليل به خبلّني
طلعت الشمس وذاب ماعاطينا
وما كان في حسابي أنه يخذلني
ولمثال في الصحبة انضربت بينا
خدعني خذلني خاني ضللني
وضيع الصحبة ف يوم ما هو لينا
ومازال عنده وجه ويقابلني
بعد ما محي جملة اللي خطينا
احسبته اذراعي
ومن غير ماننده ايجي فزّاعي
خذاني لسانه القلب جي مدّاعي
ونصّبت روحي خو لوخيّينا
ف لعب المشاعر ما أطّاول باعي
واللي حلف عندي صدق في إيمينا
في ريح في ظلمة فقدت اشراعي
كلامه نكر وقتاً طلبت العينا
امخادع لقيته ومستمر ف اخداعي
سقيته العسل وم الكدر يسقينا

عز أصحابي
بغيري عبى وأنا بهمّه عابي
يجرح كلامه وفيه ماني غابي
انجيه بسياسة وناخذه باللينا
يسفّه كلامي وفي كلامه انحابي
مش ضعف غير نفسي إمعاه رزينا
من خوف بعد الصبر ترقى أعصابي
ومن بعد ودّي نجرحه ونهينا
تباعدت عالصحبة قفلته بابي
أمّا العشرة ما تهون علينا


كلمات باللهجة الليبية.
وجدت نفسي بها
للأمانة منقولة من منتدى ليبي