[c]



البارحة يوم الخلايق نياما بيحت من كثر البكا كل مكنون
قمت اتوجد وانثرالماء على ما من موق عين ٍ دمعها كان مخزون
ولي ونة ٍ من سمعها مايناما كني صويب ٍ بين الأضلاع مطعون
وإلا كما ونت كسير السلاما خلوه ربعه للمعادين مديون
في ساعة قل الرجا والمحاما في ما يطالع يومهم عنه يقفون
وإلا كما ونت راعبّية حماما غاد ٍ ذكرها والقوانيص يرمون
تسمع لها بين الجرايد حطاما من نوحها تدعي المواليف يبكون
وإلا خلوج ٍ سايبة iللهياما على حوار ٍ ضايع ٍ في ضحى الكون
وإلا حوار ٍ نشقوله شماما وهي تطالع يوم جروه بعيون
يردون مثله والظوامي صياما ترزموا معها وقامو يحنون
وإلا رضيع ٍ جرعوه الفطاما توفت امه قبل اربعينه يتمون
عليك يا شارب لكاس الحِماما صرفٍ بتقدير ٍمن الله مأذون
جاه القضاء من بعد شهر الصياما صافي الجبين بثاني العيد مدفون
كسوه من بيض الخرق ثوب خاما وقاموا عليه من الترايب يهلون
راحوا بها حروة صلاة الاماما عند الدفن قاموا لها الله يدعون
برضاه والجنه وحسن الختاما ودموع عيني فوق خدي يهلون
حطوه في قبر ٍ غطاه الهداما في مهمه ٍ من غُرب الامات مسكون
ياحفرة يسقي ثراك الغماما مزن من الرحمة عليها يصبون
جعل البختري والنفل والخزاما ينبت على قبر ٍبه العذب مدفون
مرحوم يالي مامشى بالملاما جيران بيته راح مامنه يشكون
ياوسع عذري وان هجرت المناما ورافقت من عقب العقل كل مجنون
اخذت انا وياه سبعة اعواما مع مثلهن في كيفة ٍمالها لون
والله كنه ياعرب صرف عاما ياعونة الله صرف الايام وشلون
واكبر اهمومي من بزور ٍ يتاما وان شفتهم قدام وجهي يصيحون
وان قلت لا تبكون قالوا علاما نبكي ويبكي مثلنا كل محزون
لاقلت وش تبكون ؟قالويتاما قلت اليتيم اياي وانتم تسجون
قمت اتشكا عند ربع ٍ اعداماما وجوني على فرقا خليلي يعزون
قالوا تجوز وانس لامه بلاما ترى العذارى عن بعضهن يسلون
قلت إنها لي وفّقت بالولاما ولو جمعتم نصفهن مايسدون
ما ظنتي تلقون مثله حراما ايضاً ولافيهن على السر مامون
واخاف انا من غاديات الذماما اللي على ضيم الدهر مايتاقون
اوخبلة ٍ ماعقلها بالتماما تضحك وهي تلدغ على الكبد بالهون
توذي عيالي بالنهر والكلاما وانا تجرعني من المر بصحون
والله لولا هالصغار اليتاما وخايف عليهم من الدجه يضيعون
لقول كل البيض عقبه حراما واصبر كما يصبر على الحبس مسجون
عليه مني كل يوم ٍ سلاما عدة حجيج البيت واللي يطوفون
وصلوا على سيد جميع الاناما على النبي يللي حضرتوا تصلون


[/c]




وسلامتكم



أختكم همسة