|
قصيدة شعبية
[ALIGN=CENTER]قصيدة باللهجة العامية المصرية
للشاعر والأديب الكبير عبدالرحمن الأبنودي
طبعاً أحباب ,, والحب عجيب
ومالوش أسباب
طبعاً أحباب ,, وأنا وأنت
سؤال ومالوش جواب
يابو حس بيعرف يلمسني
وكلام ولا غيره يونسني
ياغنوه ما تحتاجش شفايف
قلبي من غير قلبك خايف
دا احنا من غير بعضنا أغراب
طبعاً أحباب ,, أحباب خالص
وبحبك من قلبي الخالص
لو نزعل ولو ان دا عمره
ماحصل بيني وبينك خالص
في دقايق !! من قال في دقايق؟
في ثواني , حبيبي بنتخالص
عشاق .. خالص
أحباب .. خالص
ولا مننا في الدنيا دي خالص
قلبنا .. خالص
حبنا .. خالص
ولا فيش زينا ابدا خالص
طبعا أحباب ,, خالص خالص
ياليالي .. حاسبي يا ليالي
وانت بتجري وافتكريني
دا انا قبل ما اقابل محبوبي
لا حسبت حياتي ولا سنيني
ايه يعني سنين؟؟
والقلب حزين
ايه يعني العمر ما دام قلبي
لا يحس الفرحه ولا الآهه
ايه يعني الدنيا ما دام
تجري من ايدي ولا حساها
دالوقت خلاص انا عندي كلام
واقدر اتكلم على الايام
انتم فاكريني ,عشان ماحلمت
خلاص انا عايشه في الاحلام
وعشان انا ماعمري ما اتكلمت
مافيش بين قلبي وبيني كلام
والحب في قلبي مش خالص
وانت ماشفتش زيك خالص
لو نزعل ولو ان دا عمره
ماحصل بيني وبينك خالص
في دقايق !! من قال في دقايق؟
في ثواني , حبيبي بنتخالص
مانتش محتاج , ولانيش محتاجة
تقولي واقولك يا حبيبي
ما انت حبيبي وانا حبيبك
وانا وانت عارفين يا حبيبي
ح انقولها عشان الناس تعرف
طب يعرفوا ليه؟
يعني لو عرفوا دا ينفعنا
يا حبيبي بايه.؟
ح يخلونا اسعد محنا ؟
وياهم حاجة تفرحنا؟
ح يقربوا نجم الليل سنه
ويعلوا الضحكة في افراحنا؟
أبداً ..أبداً خالص
الحلم اللي احنا بنحلم فيه
مهما ح نحلم عمره ما خالص
أبداً .. أبداً .. خالص ,, خالص
وانا مهما اديتك من قلبي
عمري ما حاوفيك حقك خالص
أبداً .. أبداً .. خالص ,, خالص
يا احلى من الدنيا دي خالص
واجمل من كل الناس خالص
لو نزعل ولو ان دا عمره
ما حصل بيني وبينك خالص
في دقايق ,, من قال في دقايق
في ثواني حبيبي بنتخالص
عشاق .. خالص
أحباب .. خالص
ولا مننا في الدنيا دي خالص
قلبنا .. خالص
حبنا .. خالص
ولافيش زينا أبداً خالص
طبعاً أحباب.. خالص خالص
عبدالرحمن الأبنودي[/ALIGN]
توقيع : قيصر سامراء
|