http://www.zahrah.com/up/uploads/images/cf431dbec1.gif



راح نتعرف اليوم على طبق مشهور بمدينة حلب وسوريا كلها

كاسة سميد ابيض و كاسة حليب و 300 غرام جبنة موتزاريلا و شوية ماء زهر


للحشوة


اما بتجيبي ماسكارينو و هو عبارة عن قشطة دسمة كتير


او بتعمليها بالبيت على زوقك


مشان تكمل الطبخة


بدك ورق سلوفان و شوية زيت ذرة


و للزينة بدك شوية جوز هند او فستق حلبي مبشور


وللتحلاية بدك القطر



رح نبلش بالطريقة


طبعا اهم شي القطر يكون معمول و جاهز


طريقته بسيطة هو كاستين مي و 4 كاسات و نص سكر بتغليهون عالنار مع عصرة ليمونة
لحتى يتعقدواا منيح
بتخليهون يبردوا و بتحطيلهون شوية ماء زهر او بلا على كيفك



جينا على المهم


بتحطي يا ستي كاسة الحليب بطواية كبيرة شوي و بتسخنيها عالنار
و بتحطي معها الجبنة الموتزاريلا لحتى تدوب و تصير خيوط
بتحطي السميد فوق الخليط السابق مع مراعاة انك تحطيه شوي شوي و تكون بايدك ملعقة خشب و عم تحركي بطريقة عنيفة شوي يعني تقليب سريع لحتى السميد ما يصير دعابيل
النار رح تكون هادية كتير


بتضلي بتقلبي لحتى تمسك العجينة ببعضا و تصير بيرفكت و هالشي لتقدير النظر تبع حضرتك


بتكوني جايبة ورق السلوفان و ماددتيه و داهنتيه بالزيت شي بسيط
بتحطي العجينة فوقه و بتفرديها بالشوبك بحيث ييصير سمكها شي نص سم
بطريقه حلوة ها


بتفردي القشطة فوقا و بتلفيها و بتحطي الها الفستق او جوز الهند او بتترديهن لوقت التقديم
و بتحطيها بالفريزر عشرة دقايق


طبعا التقديم ما بدو شرح طلعي العجينة من الفريزر و تركيها شوي بالبراد لحتى تبرد تمام
قطعيها على زوقك و حطيلا فستق او جوز الهند
و رشي عليها القطر او خليها على طرف للي بيحب


و صحتين و عافية


ملاحظة جبنة الموتزاريلا اظن معروفة للكل و للي ما بيعرفا اعتقد بسوريا اسما الجبنة الحلوم او العكاوي بس لازم تكون خالية من الملح
و مشان طريقة حط السميد مع الحليب مع الجبنة في ناس بيحطوا السميد و الحليب و بعدا الجبنة بس بهالحالة بصير صعب كتير خلط الجبنة و تكون تغلغلت بالعجينة كلها اما مشان الحشوة ففي اكتر من طريقة لصنعها بالبيت بس اعتقد القشطة الصافية الجاهزة اطيب بكتير

.
.منقول
.